ಗ್ರಂಥ

ನಾನು ಪದ, ನಾವು ವಾಕ್ಯ, ನಾಡೇ ನಮ್ಮ ಗ್ರಂಥವು,
ಎತ್ತ ನೋಡಲತ್ತ ಉಂಟು ಕಲಿಕೆಯಾ ದಿಗಂತವು.

ಒಂದು ಪದದ ಅರ್ಥ ನೂರು, ಸೃಜನಶೀಲ ತಂತ್ರವು,
ಒಂದು ಪ್ರೇಮ ಕವಿಯ ಸಾಲು, ಒಂದು ವೇದ ಮಂತ್ರವು.

ಒಂದು ಪದದ ಸಾರ ಇತಿಹಾಸವನ್ನೇ ನೆಡುವುದು,
ಒಂದು ಪದದಲಾದ ಡೊಂಕು ಗ್ರಂಥವನ್ನೇ ಜರಿವುದು.

ನಿನ್ನ ಅರ್ಥ - ನನ್ನ ಅರ್ಥ ಬೇರೆ ಕಾಣೋ ತಮ್ಮ,
ನಮ್ಮ ಬೆರೆಸಿ ಗ್ರಂಥವಾಗಿಸಿಹಳು ಕನ್ನಡಮ್ಮ.

ಗೋಚರ

ನನ್ನ ಮನದಲಿರುವೆಯೆಂದು
ತಿಳಿಯಲಿಲ್ಲ ನನಗೆ,
ಲೋಕವೆಲ್ಲಾ ಬದಿಗೆ ಇಟ್ಟು
ನಿನ್ನ ಕಾಯೋವರೆಗೆ.


ಬಯಸಿದಾಗ ತಿಳಿಯಿತೆನಗೆ
ನಿನ್ನ ಬಯಕೆ ಏನು...
ಮೋಹಚರಕೆ ನೂರು ಮುಖ
ಕಾಣದಾದೆ ನಾನು...


ನಿನ್ನ ಮನದ ಒಳಗೆ ನುಡಿವ
ಮಾತು ತಿಳಿಯಲಾರೆ,
ತಿಳಿಸು ನನಗೆ, ನಾನೂ ಮಿಡಿವೆ,
ಕಾಯಿಸದೆಯೇ ಬಾರೆ.

ವಿರಹವೊಂದು ಧ್ಯಾನ,
ನೀನೆ ಕೇಂದ್ರ ಬಿಂದು,
ಬಂದು ಬೇಗ ಎಚ್ಚರಿಸು
ತುಟಿಗೆ ಮುತ್ತು ತಂದು.